Van Pierewieters nao Bessemebènjers

Carnavalsvereiniging De Pierewieters woord opgerich in 1946. Auch veur d'n aorlog woord d'r in Bor al vanalles òngernòmme ròndj de vastelaovend, 't waor doe allein neet georganiezeerd. Hie kaom nao d'n aorlog verangering in. In 't kefee van Harie Hochstenbach (De Sjoester) woord door 'n aantal vastelaovesgekke besjlaote 'n vastelaovesvereiniging op te richte mit de naam: "De Pierewieters", aafgelèdj van ein teikensjtrip die in daen tied in de "Limburger Koeroer" versjeen. D'n iëste prins woord Zef Heutmekers. Kefee De Sjoester is vanaaf daen tied de Pierewieters (en noe Bessemebènjers)tempel in de vastelaovestied.

Ònger aanveuring van vors Harie Hochstenbach woord in Bor ein begin gemaak mit de georganiezeerde vastelaovend. Nao 'n paar jaor woord Vors Harie opgevolg door Jan Haagmans, dae zellef auch prins waor gewaes in 1952. Jan woord opgevolg door Lei Heutmekers, dae vervolges de scepter weer doorgoof aan Jaques Stelten. Hauwverwaege de jaore 60 kreeg Math van Pey de Vorstescepter get vaster in henj. De zestiger jaore waore trouwes neet de bèste jaore. Chrit, baeter bekènd es Broer, van Pey en zoon van Math, moos drie jaor achterein aantraeje es Prins van De Pierewieters. Toch kaome ze weer oet deze dip. 't Toenmalig besjtuur wis ònger aanveuring van prizzedent Paul Janssen de vastelaovesvereiniging weer op de reels te kriege. De Prinsegalerie koos weer aangevöld waere. Math van Pey bleef es Vors aan tot 1981 en woord toen opgevolg door Wil Lemmens. In 2008 woord Wil opgevolg door de huidige vors Dick Kleinheerenbrink. Wil is vanaaf toen groatvors van De Bessemebènjers.

Vanaaf de jaore taggetig kreeg de vastelaovend in Bor 'n aantal nuuj aktievieteite. De Prinsoetroping ging vanaaf 1985 gepaard mit ein Leedjeskonkoer. Jeder jaor sjtreeje zoan 7 of 8 deilnummers, ònger begeleijing van De Bessemkapel, later Born Collection, òm d'n tietel "Vastelaovessjlager van 't jaor" en koos de groep mit de bèste oetveuring de Prizzentasiepries in de wach sjleipe. Sins 1999 woord de begeleijing en arrezjemente mit hulp van kompjoeters gerejaliezeerd. Woorte de leedjes, es 't fienansjeel meugelik waor, eder jaor op bendjes gezat, vanaaf 1999 woorte ze op ceedee oetgebrach.

Auch de zittinge verangerde. Artieste kaomme in Bor jaore lank oet eige nès. Väöl groepe òntwikkelde zich es volwaardige artieste. 't Bèste veurbeeld hievan is 't "Trio Òngeplök": Frank Dullens, John Dullens en Paul Heffels höbbe de Borse Revuu es liërsjoal g'had en zeen inmiddels bekènd bie gans vastelaovend-vierend Limburg. En dao zeen De Bessemebènjers hiël erg greuetsj op. Auch Jan Heffels, dae in 2007 de twiëde plaats op 't Buuttekampioensjap behaolde is 'nne jòng van Bor dae jaore haet mitgedaon aan de Borse Revu en dao eder jaor weer ein nuuj krejasie oppe planke zat. Auch Jan is 'nne jòng wo v'r in Bor hiël greuetsj op zeen. Mer de animo om in Bor zelf leedjes te schrieve, noam de lètste jaore aaf. Daorum is 2011 het ieëste jaor zonger Leedjeskonkoer. De prinsoetreuping vònj plaats tiejes ein zitting mit artieste, de Groate Bessem Zitting. Die wurt noe jaorliks georganiezeerd.

De bejaarde en seniore waere neet vergaete. De Pierewieters organiezeerde al jaore in Bejaordehoes Sint Maarten ein bejaordezitting en repe dan eine bejaordeprins oet, eine inwoner van 't bejaordehoes. Säör Antoinne waor daobie ein van de gengmaekers. De lèste jaore woord meistal ein prinses oetgerope, òmdat de mansluuj sjterk in de minderheid zeen in vergelieking mit 't aantal vrouwluuj. In 1998 höbbe de Pierewieters besjlaote òm 'nne eige Seniorprins oet te rope. Ieës nog in 't bejaordehoes, mer vanaaf 1999 wurd dees zitting in 't gemeinsjapshoes g'hauwte. Auch dan traeje de artieste oet eige dörp op veur alle seniore van Bor. De bejaorde oet Sint Maarten en de luuj die sjlech ter bein zeen waere mit böskes gratis nao 't gemeinsjapshoes gebrach.

De jeug in Bor krig auch al jaore ziene eige prins en prinses. Al 26 Jeugprinse zeen d'r oetgerope, veural op de Kènjer Plee-Bek-Sjoo. Jeder jaor sjtaon in 't gemeinsjapshoes, daags nao de oetroping van de groate Prins, weer väöl kènjer te genete van de mienie-artieste die de Jeugprinsoetroping tot ein ech festein make. Vanaaf 't 4x11 waor d'r naeve de Jeugprins auch 'n echte Jeugraod van 11, mer door gebrek aan leeje is dae in 2000 weer òntbònje.

De Bordenaere zeen in de òmgaeving van auwtshaer bekènd es de bessemebènjers. Toch hèdde de vastelaovesvereiniging De Pierewieters. Op 'n anger plaats op dees sait kènt g'r laeze wo dae naam vandan kump. Toch haet dae bessem bènne de vastelaovesvereiniging ummer ein bepaalde rol gesjpeeld. Bie de oprichting droge alle leeje eine bessem op de revaer van de jas. Later verdween dae bessem weer. De vastelaovesgezèt, die in de jaore 50 woord oetgegaeve en sins 't 4x11 weer jaorliks versjient, hèt: De Bessem. In de jaore 80 kreeg de vereiniging ein nuut logo mit dao-in herkènbaar Jan Pierewiet geflankeerd door twae besseme. Es òngersjeijing veur prinse, jubelarisse en anger verdeenstelikke vastelaovesvierders woord eine mienie-bessem gemaak. Veur jubelarisse is dat inmiddels eine zilvere (1 x 11 en 2 x 11 jaor) of eine gouwe (3 x 11 jaor) mieniejatuurbessem.

De Pierewieters höbbe, op initiatief van prins Broer II, in 1997 besjlaote ein brònze beeld van de Bessemebènjer te plaatse. Mit väöl inzat zeen d'r doezende guijes biejeingesjraveld òm dit, door Niek Geelen òntwòrpe beeld, te kènne plaatse op 't plein bie de Auw Pasterie. Jaorliks wurd op dees plaats ròndj de èllefde van de èllefde de vastelaovend geäöpend mit 't veurlaeze van 'n gedich en 't heise van de vlag. Op vastelaovesdeensdig wurd de vastelaovend hie auch weer aafgesjlaote mit 't verbrenne van de bessem door de heersende prinse.

De Bessemebènjer krig wie langer wie mië 'n groatere rol in de vastelaovend van Bor. Aan 't ènj van 't jubelejumfiës in 2001 woord de vereiniging dan auch òmgeduip van De Pierewieters nao De Bessemebènjers. Al die verangeringe höbbe d'r veur gezörrig dat 't besjtuur en leeje neet allein mer van 11 november tot aan de vastelaovend aktief zeen, mer 't ganse jaor door. Ederein dae dat wilt kènt lid waere van De Bessemebènjers. Mit 'n jaorlikse kontrebusie van € 7,50 bèsse al lid. Wilt g'r mae weite, num dan 'ns kontak op mit ein van de leeje van 't besjtuur van de vastelaovesvereiniging.

De vereniging is òngertösje al bezig mit de veurbereidinge veur het 6 x 11 -jaorig besjtaonsfieës, dat in 2012 gevierd wurt. In de aanloup daohaer (mer neet daoveur), is in 2011 de Senaat van De Bessemebènjers opgerich. De Senaat is ein clubke luuj die hun sjpoare in de Borse vastelaovend verdeend höbbe, jaore lank lid zeen gewaes van de Raod van Èllef, en die bie De Bessemebènjers betrokke wille blieve.

Weer zeen d'r òs van euvertuug dat dees hiestorie in vogelvlug gein volledige besjrieving is, mer 't geuf 'n iedee wo de vastelaovesvereinging mit bezig is. Es d'r luuj zeen die in 't bezit zeen van auw fotoos, veural oet de tied vanaaf de oprichting tot aan de jaore 60, dan zouwe weer dat gaer vernumme, zoadat weer òs archief wier kènne aanvölle. Zeet geer in 't bezit hievan, dan kènt g'r kontak opnumme mit ós. Alvas bedank.