Prins Raoul I woord gebaore op 12 julie 2000 ónger ‘t sjterrebeeld kreef, in ‘t ziekenhoes van Haelder. Ze neumde ‘m: Raoul, Franciscus, Frederick, Sander Meisen.
Raoul is de zoon van John en Monique Meisen en ze wone mit z’n alle oppe Tiendsjtraot 32.
Raoul haet gein breurkes of zösterkes, mer waal ‘nne leve hóndj Jill.
Raoul zit op basissjoal Swentibold in groep 7 bie juffrouw Margot. Raoul voetbalt in de D2 van VV Bor wo ziene pap trainer is. Muziekaal is hae auch. Jedere deensdig krig’r saxefoonles van juffrouw Suzanne en op vriedig sjpeelt’r in ’t jeugorkes van harmenie L'Union.
Anger hobbies van Raoul zeen kompjoetere, wieje, Nintendo DS en teikene. Somers is hae väöl boete te vènje. Dan voetbalt’r mit zien vrunj op ’t pleintje aan de Wijngaardskamp of op ’t voetbalveldj. Skielere, waveborde en ping-ponge vuntj’r auch heël leuk.
Op vekansie geit ‘r ’t leefste nao zien vekansielendj Turkije.
Noe hae Jeugprins van de Bessemebènjers is gewaore, is d’r veur Raoul eine druim oetgekómme.
Prinses Caro is gebaore op 13 mei 2000 ónger ’t sjterrebeeld sjtier in de Martinushof 7 in Bor. Zie is de dochter van Ton en Claudia Boonen, hae ‘nne echte “Sjeng” en zie ‘nne Alkmaarse “keëskop” en woont inmiddels 8 jaor oppe Hertog Reinaldsjtraot 20, same mit häör zöster Luca en de tweë lankhäörige tekkels Jules en Sienna.
Caro zit in groep 7 van de aopenbare basissjoal De Wissel bie juffrouw Elly en meister Rob.
Caro deit aan jazzdance en ze drump bie de jeugdrumband in Bor. Häör hobbies zeen kompjoetere, laeze en auch tilleviezie kieke. Veural GTST vuntj ze heël leuk.
Caro wilt al vanaaf häör achste jeugdprinses waere. D’r waor ’n kans dat häör zöster häör veur zou zeen, sjtiekem houpde ze van neet, zodat zie ’n groatere kans zou höbbe. …
Vastelaovend haet ze mit de paplaepel ingekrege. Pap en de mam zeen neet weg te houwe mit de drie dol daag, dus motte de kènjer “verplich” mitdoon, wat ze euveriges mit väöl plezeer doon. In d’n optoch zeen ze d’r auch jeder jaor bie, want dan loupe ze mit in de groep “Bie-eingeraap”.
Liefsjpreuk Raoul & Caro
Dus noe kènt de kompjoeter aan de kentj,
Want vastelaovend is in ‘t lendj
Sjloet aan veur de polonais
Op z‘n tied eine frit mit majenais
Volg gerös noe mer mien vaere
En laot ós kómmende tied mer gewaere. |
Jeugprinseproklamasie
Ich, Jeugprins Raoul de 1e, aangeweze òm same mit mien prinses Caro te regere euver ’t Bessemebènjersriek, maak bie deze bekènd:
Ten 1ste
Dat ich greuëtsj bèn óm same mit mien Prinses Caro es Prinselik paar te maoge regere euver ‘t Bessemebènjersriek.
Ten 2de
Dat vanaaf vandaag alle hoezer in ’t dorp verseerd zeen, zodat ich same mit Prins Raoul I deze tied noats zal vergaete.
Ten 3de
Dat de Tiendsjtraor veur de tweëde keer in korte tied eine road, gael en greune prinsetempel krig, wo-in ich druim van eine ónvergaetelikke vastelaovend
Ten 4de
Dat alle luuj van d’n eine kentj zoawaal es van d’n angere kentj van ’t sjpaor eine sjoane vastelaovend höbbe.
Ten 5de
Dat de meisters en juffe de kènjer gein hoeswerk opgaeve, zoadat zie mit väöl plezeer vastelaovend kènne viere.
Ten 6de
Dat vanaaf vandaag de kènjer zellef maoge weite wie laat ze nao bèd wille gaon.
Ten 7de
Dat geer väöl plezeer maog höbbe bie ‘tr veurbereije van Vastelaovend 2011, zodat ’t Bessemebènjersriek ’t sjoanste wurd in de ganse regio.
Ten 8ste
Dat weer thoes jederen daag zellef maoge bedènke wat v’r gaon aete.
Ten 9de
Dat de waergode al ’t sjoane waer zulle beware veur de vastelaovesdaag, zoadat veer kènne genete van ’t sjtraotkarnaval
Ten 10de
Dat ze ós bie d’n drumbend en de jeugharmenie ’n vastelaovesleedje leëre sjpele.
Ten 11de
Dat ózze vastelaovesdruim wirkelikheid wurd, zoadat v’r nog lange tied, mit väöl plezeer trökdènke aan Vastelaovend 2011.
ALAAF
Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.
Aldus opgeteikend en bekènd gemaak in Bor op 9 jannewarie 2011. |
