Heuglik nuujts van het pas getrouwde hoffotogravepaar van De Bessemebènjers. Ze zeen de duuster kamer ingedaoke en 't rezultaat is ter nao.
Hie sjtaon de foto's van de prinse-resepsie en 't aansjloetende prinsebal van aafgeloupe zaoterdig en hie sjtaon de foto's van de leejemiddig, van ein paar waeke geleeje. En sjpesjaal veur de leefhöbbers zeen d'r auch nog foto's van 't Sjolkebal van de voetbalklup. Op de sait van dus.
09/02/2012
Jeugprinsepaar bie L1
Jeugprins Sven I en jeugprinses Vera zeen vemiddig te gas gewaes bie tv-zender L1. Prezentatrise Vivian Lataster sjtelde hun ein paar vraoge euver prins-en prinses zeen bie De Bessemebènjers. Dat gebeurde in 't programma Goojemiddig Limburg.
Wilt geer dees vastelaovesoetzending auch bekieke? De herhalinge zeen óm 18.00, 19.00 en 20.00 uur en mörrege euverdaag. En anges sjtuit hie de oetzending.
Trouwes, in de oetzending waore auch de vize-wènners van 't Tiener LVK te zeen en te beloestere: Suze en Larissa mit Knatsjgek oet de bol. En Larissa woont in 't Bessemebènjersriek.
Jeugprins Sven I en jeugprinses Vera in gesjprek mit prezentatrise Vivian Lastaster.
Sjtasiefoto veur in 't plekbook (of baove 't bèd).
08/02/2012
Bessem te koup
Dees waek kòmme De Bessemebènjers langs de deure mit De Bessem. 't Einige blaad dat se eigelik neet wils misse. Waort geer toevallig neet thoes toen weer langs kaome, dan lig d'r ein blaedje in de bös. Vastelaovesgezet De Bessem is de kómmende daag nog te kriege bij DA Drogis Van Sloun aan de Kapelwaeg, bij café De Sjoester aan de Mgr. Buckxsjtraot en bij Wil Lebens, Vauwersjtraot 16.
03/02/2012
Oetneuëdiging veur de receptie van de prinse.
VASTELAOVESVEREINIGING DE BESSEMEBÈNJERS BOR
neuëdig Uch oet veur de receptie van hun Prinse en Prinsesse:
op zaoterdig 11 fibbrewarie
in 't Gemeinsjapshoes Prinsbisdomsjtraot vanaaf 20.11 oer veur alle belangsjtèllende.
02/02/2012
Groatvors jureert bie LVK
Al jaore is groatvors Wil Lemmens van De Bessemebènjers zjurielid bie 't LVK. Dat waor d'r al wie de zjurie nog zételde in Bor en meujteloos maakde hae de euversjtap mit nao Buchte. Mer naodat get luuj oet Venlo veurig jaor dachte dat ze gewonne hauwe mer veur hun vervaelend plisieleedje dat niks mit vastelaovend te make haw in Buchte terecht weinig punjte krege meujte háwwe mit de zjurering van die eigewiese zjurie in de Westelikke Miensjtreek (oftewaal die van 't kaffee in Buchte) zoog 't d'r nao oet dat Wils zjuriekarriëre ein roemloas ènj gevónje háw.
Niks is echter minder waor. Wil is d'r mörrege geweun weer bie en geuf deskundig wie ummer de punjte. Neet in Bor, neet in Buchte mer in ... Kedier en Keer.
En oh jao, veur de deilnummers die denke dat se bie ozze groatvors nog gauw ein wit veutje mótte of kènne haole... Wil is sins vanaovend al op retrait. Hae bereit zich geistelik in algeheële aafzunjering veur op zien zjwaor en verantwoordelikke taak en is dus neet mae te bereike. Jaomer hè.
01/02/2011
D'r zeen nog vlagge (noe auch bie De Sjoester).
De aafgeloupe daag waore d'r koum vlagge te zeen aan de gevels van de Borse hoezer. Mer 't maog weer en 't kènt weer: die sjoan Bessemebènjersvlag oethange. Wilt geer auch zo'n Bessemebènjersvlag höbbe? Dat kán. Num dan effe kontak op mit Wil Lebens, Vauwersjtraot 16 in Bor, tillefoon: 046-485 36 43. De enige echte originele goodgekeurde Bessemebènjersvlag kos 15 euro. Òmdat Wil in deze tied van het jaor toch neet zoa väöl te doon haet, kump 'r de vlag bie uch thoes brenge (es ter neet te wiet hoof te fitse).
En bie kaffee De Sjoester, d'n tempel van De Bessemebènjers, zeen de vlagge dit jaor auch te kriege. Allein kump kastelein Willy ze uch neet brenge!
30/01/2012
Bessemebènjers höbbe aafscheid genómme van Bert Leurs
Ónger eine raege van witte konfettie haet de Borse gemeinsjap vandaag aafscheid genómme van Bert Leurs. Bert waor senator en auwt prins van De Bessemebènjers. Hae sjtorf aafgeloupe dónderdig op 49-jaorige laeftied. Óm 10 oer vanmörrege zeen de drumbend van hermenie L'Union en de raod van ellef van De Bessemebènjers Bert toes gaon haole en höbbe häöm begeleid nao de kirk, wo de oetvaartdeens gehauwte woort.
Op de roaje kis (zien leevelingskleuër) laog ein bloomsjtök mit roaj roaze, de bessem, ziene senatorsjteek en de mace (de tambour-maitre-sjtek) van de hermenie. Auch loag d'r ein kruutske dat ziene zoon Loek zellef gemaak haet.
Groatvors Wil I sjprook in de kirk ein In Memorie oet, dat geer hie kènt nao-laeze. Nao de mès is de senator in beslaote kring nao 't krématorium gebrach.
In 't gemeinsjapshoes van Bor waor tegeliekertied ein biejeinkóms veur de vereniginge en de luuj die Bert nej aan 't hart ginge.
26/01/2012
Versjlageheid euver de doad van senator Bert Leurs
Mit óngeluif en enorme versjlageheid höbbe het besjtuur en de raod van ellef van Vastelaovesvereiniging De Bessembènjers kènnis genómme van het sjterve van senator en auwt-prins Bert Leurs.
Ofsjoan v’r wiste dat Bert krank waor, höbbe v’r ummer houp gehad dat hae d’r baovenop zou kómme en weer mit koos goan doon aan de aktiviteite van de vereiniging die hae tot ’n paar jaor geleje es besjtuurslid haet gedeend en wao hae, es oprichter en lid van de senaat, nog ummer gans nej bie betrokke waor.
Auch wie hae krank waor haet Bert ummer zien verbónjeheid mit de vereinging laote blieke. Ziene, toch nog, plotselinge doad is op dit moment veur ós nog neet te bevatte.
Veer wunsje Bep en Loek, zien moder Marga en de euverige femilieleje heël väöl sjterkte toe bie ’t verwirke van dit groate verlees.
De oetvaart vuntj plaats op maonjig 30 jannewarie óm 10.30 oer.
26/01/2012
Revuu en seniorerevuu aafgelasj
In verbenjd mit het plotselinge sjterve van senator en auwt-prins Bert I Leurs gaon de revuu en de seniorerevuu op 28 en 29 jannewarie neet door.
Luuj die in de veurverkoup al ein kaertje veur de revuu gekoch hauwwe, kènne dat trök inlevere op dónderdig 2 fibbrewarie van 19.30 oer tot 20.30 oer in kaffee De Sjoester, Mgr. Buckxsjtraot 3 in Bor. Per kaertje wurt dan 't aankoupbedraag verraekend. Kènt geer dónderdig 2 fibrewarie neet, dan is 't meugelik de kaarte in te levere bie de penningmeister Pascal van Baaren, Städgen 10 in Bor. Es geer 't raekeningnommer op een blaedje of ein breefke sjrif, dan wurt 't geljd euvergemaak.
23/01/2012
Seniorerevuu, zeker de meute waert.
Op zaoterdig 28 jannewarie is in 't gemeinsjapshoes de Borse revuu, mit es tema 'Bekiek 't mer'. Unne daag later, op 29 jannewarie, vunjt de tweëde oetveuring van dees revuu plaats, mit es titel Seniorerevuu. Hie en dao is ter get veranderd in het program, mer in zien algemeinheid is deze seniorerevuu 'tzelfde es de Borse revuu van eine daag later. Zeker de meujte waert om nao te kòmme kieke, dus.
Es geer op zaoterdigaovend neet kènt, of es 't uch dan te laat wurt: kòm op zunjig kieke. De revuu begint om 14.11 oer en de entreepries is erreg vruntjelik: 4 euro.
(Veur de zaoterdigaovend zeen trouwens auch nog kaertjes te kriege bie de veurverkoupadresse: DA Van Sloun, kaffee De Sjoester en Wil Lebens).
23/01/2012
Pin nog neet gekrege? Kóm 'm haole bie de Revuu
't Waor drök, veurige zunjig bie de Leejmiddig. Ongertösje sjtuit de tèller van de leeje-administrasie op zoan 300 leeje. En dao zeen weer natuurlik gans greutjs op.
Waort geer door ómsjtenjighede neet in de gelegenheid óm de Pin te kómme haole, dan kènt geer 'm nog kriege bie de Borse Revuu, op 28 jannewarie, of bie de Senionererevue, op 29 jannewarie. Gaer effe melde bie de bonneverkoup.
22/01/2012
Opgaeve optoch
Nog veer waeke en dan truk de groate optoch van De Bessemebènjers door de sjtraote van Bor. Wilt geer mitdoon, laot ós dat dan effe weite, zoadat weer uch ein plaats kènne gaeve, inclusief ein nummer. Opgaeve kènt bie 't optochcomité, Thei Jennen, Kempstraat 55 in Bor, til. 046-485 28 50, email: optoch@bessemebenjers.nl. Aanmelje kènt tot en mit dònderdig 16 fibberwarie.
20/01/2012
Veurverkoup Borse revuu gesjtart
De veurbereijinge zeen volop aan de gang veur de Borse Revuu, dae dit jaor op zaoterdig 28 jannewarie gehauwte wurd. Zaowie geer wet traeje op deze revuu allein mer Borse artieste op. Die oefene op dit moment keihel óm uch eine sjoane aovend lang te kènne ammezere.
Wilt geer dit sjpektakel neet misse, koup dan in de veurverkoup de kaertjes. Veurverkoupadresse zeen: DA Drogis Van Sloun aan de Kapelwaeg, café De Sjoester aan de Mgr. Buckxsjtraot en bie Wil Lebens, Vauwersjtraot 16. Kaertjes koste 7,50 es geer wilt zitte in de zaal van 't Gemeinsjapshoes. Kènjer maoge veur drie euro nao bènne.
16/01/2012
Logo en websait 6 x 11 geprizzenteerd.
De aafgeloupe waek is, tiejes aktiviteite van De Bessemebènjers, het logo van het 6 x 11-jaorig besjtaonsfeës geprizzenteerd. Dat gebeurde op de Groate Bessemezitting. Aafgeloupe weekend, in De Sjoester, koos veur de eëste keër kennis waere gemaak mit de websait van het 6 x 11 jaorig feës. Wilt geer 'ns kieke nao, klik dan sjnel op het logo hie-ònger.
13/01/2012
Geine wennèr prinse-poll
Veur de prinsoetreuping van aafgeloupe zaoterdig koos geer raoje wae prins zou waere van De Bessemebènjers. En väöl luuj höbbe mitgedaon aan deze poll. In totaal woorte 16 kandidaat-prinse geneump, en kreeg Maurice Heffels de meiste veursjpellinge achter ziene naam. Mer nemes hauw de naam van de nuuje prins van De Bessebènjers good geraoje.
11/01/2012
15 jannewarie Leejemiddig
Kaffee De Sjoester aan de Mgr. Buckxsjtraot 3 in Bor is zunjig 15 jannewarie de plaats wo De Bessemebènjers hunne tradisjonele leejemiddig hauwte. In deze oetneuedigingsbreef sjtuit alle info. Hoagtepunjt van deze middig is zonger twiefel het optraeje dat Robert Buckx oet Obbeeg/Berg aan de Maas zal gaeve.
Alle leeje die aanwezig zeen kriege oet henj van de prinsepaare van dit jaor de pin van dit jaor.
Auch neet-leeje zeen van harte welkom. En luuj die lid wille waere, maoge deze breef bie de Bessemetaofel in het kaffee inlevere
11/01/2011
Foto's prinsoetreupinge klaor
De foto's van de prinsoetreupinge zeen te bekieke:
Hie de foto's van zaoterdigaovend, hie de foto's van zunjigmiddig.
En oh jao, de foto's van de äöpening van 't sezoen zeen auch klaor. Kiek mer.
10/01/2012
Proklamasie noe auch nao te laeze
Höb geer zaoterdig of zunjig de proklamasie van de prins of de jeugprins gemis? Ten 1e is dat gein prebleem. Want ten 2e höbbe veer ze veur uch oetgetiep. En ten 3e kènt geer de proklamsie vènje op de pagina van de prins. Hie dus voor prins Jack IV en hie veur Sven I. Waal ff gans óngeraan oppe pagina kieke, estebleef.
09/01/2012
Sven I en prinses Vera oetgerope tot jeugprinsepaar
Veurdat een sjmaakvolle, drökbezòchte Kenjer Play Back Sjoo begoos zeen Sven Simons en Vera Coumans oetgerope tot jeugprinsepaar van De Bessemebènjers.
De nuuj prinsepaare woorte oppe bühn van 't Gemeinsjapshoes geïnsjtalleerd en krege de verseersele die bie hun funktie heurt. En veur de prinsesse waor d'r natuurlik ein bleumke.
03/01/2012
Vleeger noe te douwnloode.
Tûsje Kermis en Nuujaor (of get eaërder) haet De Bessemebènjers hoeës aan hoeës in Bor ein blaedje ronjdgebrach met dao-op vööl informasie euver de aktiviteite van dit jaor. Höb geer deze 'Vleeger' neet mae, duuj dan op dit weurdje en geer kènt 'm laeze of douwnloode.
19/12/2011
Veurverkoup Groate Bessem Zitting begoos
Vanaaf vandaag kènt geer kaertjes koupe veur de Groate Bessem Zitting van zaoterdig 7 jannewari. De kaertjes koste 7,50 euro veur volwassene en 3,00 euro veur kènjer.
De veurverkoupadresse zeen: Café De Sjoester, Mgr. Buckxsjtraot 3 en DA-Drogis Van Sloun aan de Kapelwaeg 2. Auch bij Wil Lebens, Vauwersjtraot 16, kènt geer kaertjes koupe.
Op de Groate Bessem Zitting, op zaoterdig 7 jannewari in het Gemeinschapshoes in Bor, traeje op: Frans Theunisz, Kölsj Plat en buuttereedner Jan Heffels oet Obbeeg (mer eigelik van Bor). Mèr 't belangriekste is dae aovend toch dat dan de oetreuping en insjtallasie van de nuuje prins en de nuuje senioreprins gebeurt.
Jan Höffels, eigelik van de Kirksjtraot met noe wonend in Obbeeg, es playboy.
12-12-11
WW Band nao 6 x 11-jaorig feës
De WW-Band treut op 17 november 2012 op in Bor, tiejes het 6 x 11-jaorig besjtaonsfeës van VV De Bessemènjers. Zanger Ton Meissen, alias Antonio Rosso, haet dat gistere bekènd gemaak, presies 333 daag veurdat 't feës van sjart geit.
Antonio Rosso maakde gister bekend dat de WW-Band op 17 november in Bor optreut.
Veur de fans van de WW-Band is dit optraeje ein unieke kans om ein van de bekènste Limburgse bends oajt nog 'ns aan 't werk te zeen.
't Maog duudelik zeen dat 't De Bessemebènjers blood, zjweit en eine ieskas mit drank gekos haet om de WW-Band zoawiet te kriege om weer op de bühn te kroepe. De groep oet Zitterd sjtopde offisjeel in 1995 en haet daonao nog mer een paar rejunie-konserte gegaeve.
Kaarte veur 't optraeje van de WW-Band in de feëstent oppe Mert in Bor zijn vanaaf Paosje 2012 te kriege.
Kiek veur 't komplete program van het 6 x 11-jaorig feës hie.
14-11-11
Sezoen is offisjeel geäöpend
Prins Rich I en prinses Anke höbbe op zaoterdig 12 november 't sezoen offisjeel geäöpend. Dit jaor koos de plechtigheid doorgaon bie 't beeld van De Bessemebènjer aan de Kirksjtraot, wo Rich 't gedich veurloos. Daonao maogde de prinse in de Bessemebènjerstempel De Sjoester hun lieske aan ein naegelke hange.
Zeer opmerkelik waor het dènk dat vors Dick op ein gegaeve mèment op ziene sjteek droog.
Mer waat waor 't?
a) ein apparaat om de aardsjtraole in De Sjoester te maete
b) peilzender zoadat Marlies kènt zeen wo Dick is
c) ein apparaat dat veurzaet wat vors Dick mot zègke
d) rechsjtreeks kontak mit de maonmenkes
e) de nuutste klommel oet Sjina
14-11-11
Getrouwd
Het keesveesje broedspaar Twan en Esther (getrouwd op d'n 11e van de 11e) woorte bie de äöpening van 't sezoen geiërd mit ein oorkonde van De Bessemebènjers.
Twan en Esther zeen de hoffotograve van De Bessemebènjers (same mit Niek trouwes) en sjtaon normaal altied aan d'n angere kenjt van de camera. Mer noe dus ff neet.
12-11-11
Mjoezekel 6 x 11 zeuk sjpelers
De eëste aktiviteit van het 6x11-jaorig besjtaon van VV De Bessemebènjers (volgend jaor november) is de oetveuring van eine echte mjoezekel (net zoa-es dat auch 11 jaor geleeje gebeurde). Deze mjoezekel sjuit ônger regie van Robert Buckx, dae dat bie het 5 x 11-jaorig besjtaon auch veurtreffelik gedaon haet.
Voor deze mjoezekel zeen veer op zeuk nao (toneel)sjpelers, veur verschillende rolle. Om uch ein idee te gaeve waat de bedoeling is, is t'r op 30 november eine info-aovend in het Gemeinsjapshoes van Born. Geer zeet van harte oetgeneuëdigd ôm ôm 20 oer te kòmme loestere en natuurlik auch ôm dan vraoge te sjtelle. Zeet geer waal geïnteresseerd, mer kènt geer neet daen aovend? Num dan effe kontak op mit: cliffverjans@6x11.nl.
En anges gaer tot 30 november, in 't gemeinsjapshoes.
11-11-11
Doog mit aan de Pleej Bek Sjoo
Op zunjiig 8 jannewarie hauwte veer, zoa-wie al hieël väöl jaor, de Kènjer Pleej Bek Sjoo. Die Pleej Bek Sjoo sjtart direk nao de oetreuping van de jeugprins en jeugdprinses en vunjd plaats in 't gemeinsjapshoes van Bor.
EN DICH KÈNS DER BIE ZEEN EN MIT DOON
Höb se altied al 'ns dien idool wille naodoon? Wil se eine keër allein, of same mit die vrunj of viendinne oppe bühne staon met väöl leeg en echte roukeffekte? Dan is dit dien kans!
Opgeven kènt door ein meeltje te sjture nao jeugd@bessemebenjers.nl. Doog dat waal veur vriedig 16 december. Sjrief in dat meeltje dudelik:
de name van de kènjer die mitdoon - de arties of groep die wurt naogedaon - de naam van 't leedje dat wurt naogedaon - de naam, 't meeladres en 't tillefoonnummer van de kontakpersoon
De jeugkemissie van De Bessemebènjers (Lei en Marianne en Bèr en Lud) leüt dich nao 16 december weite wie 't wieër geit.
07-11-11
Bor auch in het groate LVK-book
Op de 11e van de 11e wurt 'Vaan Eysde tot de Mookerhei' geprezenteerd. Dat is een groat book euver vastelaovend in Limburg, en dan mit name in die plaatse die eine LVK-wènnaar höbbe veurtgebrach. Veurig sezoen, ònger het Bèssemverbrenne, haet eine fotograaf van de oetgaever rònjdgerent in Bor en väöl foto's gemaak. Zeker ein daovan sjuit in het geneumde book. Mae weite? Kie hie.
29-10-11
Aopening van 't sezoen
Op zaoterdig 12 november wurt 't sezoen geaopend bie 't beeld van De Bessemebènjer aan de Kirksjtraot. Om 11 op 8 leus prins Rich I dan 't tradisjonele gedich veur. Dao-in wurt jeder jaor gevraog of De Bessemebènjer euver de vastelaovesvierders van Bor witl wake.
Aansloetend hange de prinseparen Rich en Anke, jeugdprinsepaar Raoul en Caro en seniorepaar Frans en Annelies hun lieskes mit foto op in de lange rij van prinsepare in café De Sjoester, de tempel van De Bessemebènjers.
Nao deze offisjele aangelegehede volg eine ronjdgang langs de cafés van Bor. Prinsepare, raod van 11 en besjtuur van De Bessemebènjers houpe väol luuj van Bor te maoge taeegekomme op deze aopenin.
9-10-11
Tema veur 't nuuje sezoen bekènd
Waeke haet eine kemissie van wieze luuj naogedach, same höbbe ze nog ein paar daag vergaderd in ein hutje op de Verkeshei. En noe is 't zoawiet: het tema veur het sezoen 2011/2012 is bekènd: Bekiek t mer.
En natuurlik is Bekiek 't mer auch 't tema van de revu van kommend jaor.
13-9-2011
't Program veur 2012 is bekènd
De vors haet gesjpraoke, de schriever haet gesjreve en hie sjuit het program van de Borse vastelaovend veur 2012. Pak d'n agenda mèr en noteer de belangriekste datums van het ganse jaor.
29/08/2011
Bessemebènjers zeuke opvolgers van jeugprinsepaar Raoul I en Caro
Wil se jeugprins of jeugprinses waere? Dan höbse noe de kans! Esse teminste aan ein paar veurwaardes voldeis. Doe môs in Bor wone, in groep 7 of groep 8 van de laegere sjoal zitte (of in een vergeliekbare klas op 't Belsj) en doe môs natuurlik 't vastelaovesvirus in dien blood höbbe zitte.
Opgaeven kan tot vriedig 30 september 2011 bij
Lei en Marianne Kirkels, Städgen 6, Born
Til. 046-4859109 of 06-53576550, e-mail: s.kirkels@planet.nl
Sjrief in eder geval op wae se bûs, wo se woons, het tillefoonnummer van de pap en de mam, wienèë se gebaore bus en in welke klas van welke sjoal dat se zits.
En mesjien wurs doe op 8 jannewarie dan waal geïnsjtalleerd es de nuuje jeugprins of jeugprinses van De Bessemebènjers.
23/08/2011
Jubileumprogram 6 x 11 jaor Bessemebènjers deils bekènd
Vastelaovesvereiniging De Bessemebènjers viert van 9 tot en mit 18 november 2012 heürr 6x 11-jaorig bestjaon. Op 23 augustus, presies 444 daag veurdat de festiviteite losbarste, haet het feëskommieté het eërste deil van het program bekendgemaak.
Ut eëste weekeinde kent drie groate evenemente. Op vriedig 9 november 2012 wurt 't feës ge-eupend mit eine mjusikàl wao-in de senioreprins en de jubilejumprins zulle waere oetgerope. Net es 11 jaor geleje, toen de mjusikàl ein groat sukses waor, is de regie van deze auch volgend jaor in henj van Robert Buckx (dae ongertösje es zenger al de finale haeit weite te bereike van het LVK. Op de eëste zaoterdig wurt sjmiddes de jeugprins oetgerope, ônger de Borse versie van X-fektor. Saoves sjtuit ein unieke sjow op 't program, de Limburgse Gala Aovond. Beppie Kraft en Erwin traeje dan op, same mit 't Marlstone-orkes. Van teveure höbbe W-Dreej en Kartoesj al gezörrig veur sjtumming in de tent op de Mert in Bor. Trouwes, op deze aovond is der volop meugelikheid om mit te doon mit de artieste onger 't ‘theke-sènge’.
Het eëste wiekend wurt op de 11e van de 11e 2012 aafgeslaote mit 'n jubilejumreceptie en 'n optraeje van Wir Sind Spitze.
Euver 111 daag wurt 't twaede gedeilte van het programma bekèndgemaak. Daobie zit nog ein gans biezunjer optraeje.
06/06/2011
Bessemebènjers figurere in videoklip Angelina
Sjpesjaal veur de L1 Limbo Top 100 haet L1 ein paar videoklipkes gemaak van bekènde Limburgse leedjes. Ein van die klipkes is (deils) gefillemp in de ruu-iene van het kesjtael. De Bessemebènjers - es echte kènners van het Limburgse leed - zeen gevraog om mit te doon es beeldvulling. Kiek nao 't rezultaat.
30/03/2011
Video-aovend op 9 april
Zaoterdag 9 april vunjt in kafee De Sjoester de jaorlikse video-aovond plaats. Vanaaf 20.11 oer zal op ein groat sjerm het afgeloupe sezoen nog 'ns veurbie kòmme.
Dus, es geer get gemis höb of geer wilt nog 'ns naogeneete, dan is dae neugende april de goeje aovend òm, same mit de prinse en prinsesse, de vastelaovend nog 'ns de revu te laote passere. Geer zeet van harte welkom.
Veur 11 euro is de DVD van 't sezoen 2011 trouwes dan aovend te koup.
12/03/2011
Nog mae foto's
Actionfoto, de hofleveranceer van de foto's van De Bessemebènjers, is vandaag de dònker kamer ingedaoke en haet eine houp rölkes ontwikkeld. Van de reseptie tot en mit het bessenverbrenne zeen die foto's te bekieke via de fotopagina.
09/03/2011
Nuuj foto's
Op de fotopagina sjtaon ein paar nuuj links nao foto's van de Borse vastelaovend. Väöl plezeer bie het naogeneete.
07/03/2011
Oetsjlaag optoch
Oetsjlaag van de Groate Optoch van Bor:
Kategorie 1. Groate Wages mit groep
1. Achter 't Sjpaor - Laot die boere mer gewaere
2. 't Aldenhöfke - Weer touvere alvas 6 x 11 veur De Bessemebènjers
3. VC De Sjloestige - Flower Power
Kategorie 2. Groate groepe
1. FF Serieus - Weer paraderen veur de prins
2. De Plekzek - Laot mer gewaere - Burberry baere
3. Doëvehok De Sjoester - Jo de Doevedokter
Kategorie 3. Kleine groepe
1. De Auw Sjötte Bor - Veer höbbe noajt zös gooje
2. Ummer Anges - Make love not war
3. De Bielemen Klen - De nuuj modelle van NedCar
4. Einzelgängers en gans klein gruupkes
1. Ronald & John - Ich höb las van 'nne miteater
2. Michel Deckers - Miesj zeuk Rich
3. Niels en Kevin - De Jäger-Meisters
1e pries groate wages mit groep
1e pries groate groepe
1e pries kleine groepe
1e pries einzelgängers en gans klein gruupkes
05/03/2011
Senaat opgerich
'n Paar waeke geleeje alweer is de Senaat van De Bessemebènjers opgerich. De Senaat is ein clubke luuj die hun sjpoare in de Borse vastelaovend verdeend höbbe, jaore lank lid zeen gewaes van de Raod van Èllef, en die bie De Bessemebènjers betrokke wille blieve. Groatvors Wil Lemmens insjtalleerde op 't ènj van de revu Bert Leurs es eëste lid van de Senaat. Bert kreeg ein spesjale steek, die natuurlik waal dezelfde kleuëre haet es die van de leeje van de Raod van Èllef.
04/03/2011
Wènners sjoans verseerde vinster bekend
De femilie Fleisscheuer en Jack van Oorschot Optiek zeen de wènners gewore van de eëste edisie van de wedsjtried De sjoans verseerde vinster van Bor. Kiek op de spesjale Vinster-pagina veur alle biezunjerheeje.
Prins Rich I, inisjatiefnummer van dees wedsjtried, waor content , zoa zag hae: ,,Weer höbbe väöl sjoan verseerde vinstere gezeen. Oeteindelik waore weer - de prinse en prinsesse - het èns euver de wènners."
Op de foto zeet ger prins Rich I in gesprek mit de hieër Fleischeuer. Op de veurgrònjd de pries, ein vastelaoves-euverlaevingspakket.
03/03/2011
Prins Rich installeert prins Hub van Sint Maarten
Goonzig 2 meërt waore De Bessemebènjers te gas in verzörgingshoes Sint Maarten aan de Putsjtraot, wo de tradisjonele seniorezitting plaatsvonj. Senioreprins Frans I en zien prinses Annelies zörgde derveur dat prins Jac I van Sint Maarten geplök woort en ziene scepter inleverde. Daonao waor 't de beurt aan Prins Rich en Prinses Anke òm de nuuje prins van Sint Maarten te insjtalere. Tot verrasjing van väöl aanwezige, haet Sint Maarten dit jaor neet eine prins of ein prinses, mer ein ech prinselik paar: prins Hub I en zien prinses Doortje. Ze wone noe ein jaor in Sint Maarten en zeen van oirsjprong aafkomstig oet 't Zawpenseriek.
01/03/2011
D'r zeen nog vlagge
Sjoan hè, al die vlagge aan de gevels van de weuninge in Bor. Wilt geer auch zo'n Bessemebènjersvlag höbbe? Dat kan. Num dan effe contac op mit Wil Lebens, Vauwersjtraot 16 in Bor, tillefoon: 046-485 36 43. De enige echte originele goodgekeurde Bessemebènjersvlag kos 15 euro. Òmdat Wil in deze tied van het jaor toch neet zoa väöl te doon haet, kump 'r de vlag bie uch thoes brenge (es ter neet te wiet hoof te fitse).
28/02/2011
Auwt-prinse oet buurdörpe zjurere d'n optoch
Het Optochcomité van de Bessemebènjers haet dit jaor eine nuuje zjurie veur 't beaordeile van de kreasies die mitloupe in de Groate Optoch. En 't zeen neet de minste die weer bereid gevònje höbbe òm hun deskundig oardeil te gaeve. Nemes minder es auwt-prins Paul Janssen van de Louvermen, auwt-prins Salvian van Cleef van de Doale en auwt-prins Marc Scheeren van de Tuurhouters zeen de zjurieleeje.
, ,
Deilnùmmers waere ingedeild in veer kategorieë:
1. Groate Wages mit groep
2. Groate groepe (15 tot 100 man)
3. Kleine groepe (5 tot 14 man)
4. Einzelgängers en gans klein gruupkes (1 tot 4 man)
De zjurie, die al ein paar daag in aafzunjering is om zich veur te bereije op hun zjwaor en verantwoordelikke taak, let sjpezjaal op:
1. Idee/thema, originaliteit, 't werk dat aan de wage gedaon is, kleuër en vormgaeving, bewaeging en techniek, aafwirking en natuurlik of de waage zelf gemaak is, of dat 't gehuurd is.
2. Idee/thema, originaliteit, kleijing, kleuër en vormgaeving, humor en sjpel.
3. Idee/thema, originaliteit, kleijing, kleuër en vormgaeving, humor en sjpel.
4. Idee, humor en prezentasie.
28/02/2011
Alles euver d'n optoch
Nog ein paar daag en dan truk de Groate Optoch weer door 't Bessemebènjersriek. Natuurlik kènt geer langs de kènjt sjtaon en de appelesiene en de sjlôk vange, dae Prins Rich I, prinses Anke, jeugprins Raoul I en jeugprinses Caro of senioreprins Frans I en prinses Annelies uch toesjmiete. Mer es geer mit wilt doon, dan vènje weer dat nog väöl sjieker. Daorom: laot uch get invalle en gaef uch op bie Thei Jennen, Kempstraat 55 in Bor, til. 046-485 28 50, email: optoch@bessemebenjers.nl. Aanmelje kènt tot en mit dònderdig 3 meërt. Klik hie veur 't optochreglement.
De hermenie is d'r auch weer bie
Opsjtèlling Groate Optoch6 meërt: Graaf van Loonsjtraot
Zao wiet geer waal zult weite, haet René Raats het Bessemebènjersleed gesjreve en gezònge. Dit leedje geit euver de Bessemebènjers en woord precies 666 daag veur het 6 x 11-jaorig besjtaon van De Bessemebènjers (in november 2012 wurt dat gevierd) geprezenteerd.
Bie dat leedje is noe auch eine videoclip gemaak, door Jean Greijn (dae daobie geestelike ongersjteuning kreeg van Yvonne Spetgens en Maarten de Kever).
De raod van èllef en anger belangsjtellende höbbe zaoterdag 15 jannewarie de hoëzer verseerd van de prinse en prinsesse van dit jaor. Kiek hie veur ein korte impressie.
Op donderdig 13 jannewarie, prezies 666 daag veurdat Vastelaovesvereiniging De Bessemebènjers zijn 6 x 11-jaorig besjtaonsfeës geit viere, woort het nuuje Bessemebènjersleed offisjeel geprizenteerd. Het leedje is gemaak door Rene Raats, dae het auch zunk.
Auch woort in D'n Tempel van De Bessemebènjers, kaffee De Sjoester, ein sjerm onthuld door jeugprins Raoul en jeugprinses Caro, wo-op de daag sjtaon pes dat het feës is (en anger berichte van de Bessemebènjers) en leet veurzitter Piet Leurs de aanwezige weite dat ein apaarte sjtichting 'Vastelaovend in Bor' het 6x 11-jaorig besjaonsfeës van De Bessemebènjers geit organisere.
In de kezet haet trouwes einsjtökske gesjtange euver 666 daag. Hie kènt geer dat laeze.
Op de roaje kis (zien leevelingskleuër) laog ein bloomsjtök mit roaj roaze, de bessem, ziene senatorsjteek en de mace (de tambour-maitre-sjtek) van de hermenie. Auch loag d'r ein kruutske dat ziene zoon Loek zellef gemaak haet.
.png){kind=logo}
De nuuj prinsepaare woorte oppe bühn van 't Gemeinsjapshoes geïnsjtalleerd en krege de verseersele die bie hun funktie heurt. En veur de prinsesse waor d'r natuurlik ein bleumke.
Jan Höffels, eigelik van de Kirksjtraot met noe wonend in Obbeeg, es playboy.
Antonio Rosso maakde gister bekend dat de WW-Band op 17 november in Bor optreut.
Op de 11e van de 11e wurt 'Vaan Eysde tot de Mookerhei' geprezenteerd. Dat is een groat book euver vastelaovend in Limburg, en dan mit name in die plaatse die eine LVK-wènnaar höbbe veurtgebrach. Veurig sezoen, ònger het Bèssemverbrenne, haet eine fotograaf van de oetgaever rònjdgerent in Bor en väöl foto's gemaak. Zeker ein daovan sjuit in het geneumde book. Mae weite? Kie 
Op de eëste zaoterdig wurt sjmiddes de jeugprins oetgerope, ônger de Borse versie van X-fektor. Saoves sjtuit ein unieke sjow op 't program, de Limburgse Gala Aovond. 
, 
, 
