Tot Jeugprins en Jeugprinses zeen gekaoze: Sven Simons en Vera Coumans

Zie zulle regere es

Jeugprins Sven I en Jeugprinses Vera

Sven woord gebaore es Laurent, Elisabeth, Matthijs Simons op 1 julie 2001 in ’t Maaslendjkrankenhoes in Zitterd ónger ’t sjterrebeeld kreef.
Sven is ‘nne zoon van Pascal Simons en Nicole Schrijen en same wone ze oppe Hennekoelsjtraot 11. Zien hobbies zeen voetballe bij de E1 van VV Bor. Auch zit‘r gaer mit ’n gaert aan de waterkentj óm te vösje. Zien mam is ’n echte Bessemebènjer en ziene pap ‘nne Winkbuul. Neet vraem dat hae daoveur ‘nne trouwe supporter is van Roda JC. Dao zit ‘r, same mit zien prinses, óm de anger waek op de tribuun.
Van kleins aaf aan viert Sven vastelaovend mit de Bessemebènjers. ’t Leefs gekleid in ’n prinsepekske en ’n sjteek oppe kop. Vastelaovends is ‘m mit de paplaepel ingegaeve, want zien euvergroatoma is häöm al veurgegange es bejaardeprinses van St Maarten bie de toenmalige Pierewieters, en zien opa en oma waore Senioreprinsepaar van de Bessemenbènjers. Tweë jaor geleje waor hae adjudant van zien naefke Youri bie de Lollige Bök in Detere.
Sven zit oppe Swentiboldsjoal in groep 7 van juffrouw Margot. Nao sjoal is hae meistal te vénje op ’t voetbalveldj same mit zien vrunj. Toch zit’r gaer op zien sjpeelkamer mit de lego. Hae haet auch nog zös sjilpadde, die, ’t zal nemes verbaze, name höbbe van bekènde voetballers.

Vera woord op 2 april 2000 in Bor gebaore ónger ’t sjterrebeeld ram. Pap en mam neumde häör Vera, Desirée, Marinus Coumans.
Vera woont mit pap en mam en zösterke Laura van 9 oppe Prins Bisdomsjtraot 31.
Papa Frans is ‘nne Sjteinder Bok van gebaorte. Mama Angelique woord gebaore in ’t Narreriek in Euverhaove, mer greude op in ’t Pierewietersriek: ‘nne Bessemebènjer dus.
Vera zit oppe Swentiboldsjoal in groep 8 bie juffrouw Truus.
Vera geit waal gaer mit Sven nao ‘t voetballe, mer aktief deit ze hendjballe bie HV Bor in ’t C2 tiem. Ze is auch heël krejatief mit teikene en knutsele, mer ’t leefs is ze boete mit vrunj. Vanaaf häör viefde jaor waor ze neet meër achter de paort te hawte. Òntèlbare rundjes haet ze al gemaak op häör fitske. Noe zit dat fitse zoa d’rin, dat ze euver ’n paar jaor gaer mit pap en zien fitsvrunj van de Vedettekes mit wilt gaon op zunjigmörge. Mesjien waal ein nuuj Leontien?
Vera geit al van jóngs aaf aan mit in d’n optoch en kan d’r gein genóg van kriege. Vastelaovend viere haet auch zie mit de paplaepel in gekrege. Jeugprinses waere is de sjlaagroum op ’t toetje.

Jeugprinseproklamasie

Ich Jeugprins Sven I, aangeweze òm same mit mien prinses Vera te regere euver ’t Bessemebènjersriek, maak bie deze bekènd dat:

Ten 1ste
Jederein zich wie ‘nne vösj in ‘t water mót veule kómmende vastelaovend.

Ten 2de
Mit de vastelaovend hendjbalvereiniging Bor en voetbalvereiniging Bor de hendjes maoge laote wappere.

Ten 3 de
Ós klasgenootjes bie juf Margot en juf Truus ós hoeswerk mótte make.

Ten 4de
De luuj oet Bor de optochroete road, gael en greun laote kleuëre.

Ten 5de
D’n tied ós niks oetmaak en weer röstig door kènne gaon tot in de kleine uurkes.

Ten 6de
Katty Perry en Lady Gaga kómmende daag waere vervange door Fabrizio en Big Benny.

Ten 7de
Juf Margot en juf Truus neet kaod hove te waere es v’r ‘nne keër te laat kómme

Ten 8ste
Dat de femilie van Vera en Sven same in Bor vastelaovend kómme viere.

Ten 9de
Gans Bor maog oetloupe veur de groate en kleine optoch.

Ten 10de
De kènjer van de Swentibold en de Wissel heëlemaol los maoge gaon.

Ten 11de
Dat de hoezer van Vera en Sven heël sjoan verseerd maoge waere.

Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en bekènd gemaak op 8 jannewarie 2012.