SJPONZERS
EËSVOLGENDE AKTIVITEIT BESSEMEBÈNJERS

Borse Bessemzitting-Leedjeskonkoer
12 jannewarie 20.11 oer
Gemeinsjapshoes

Aaftélle

Prins Janny I en Prinses Joyce 2016

 

Tot Prins van de Bessemebènjers is oetgerope Janny Coenen

Hae zal regere es Prins Janny I

In dit amb wurt-er biegesjtange door Prinses Joyce.
 

 

Janny woord gebaore es kerskiendje in 1973 oppe Bergsjtraot, de Verkeshei. Dao woont hae same mit Joyce en hun tweë kènjer Mika van 10 en Luna van 7 en d’n hóndj Max, nog ummer in ’t awwershoes.
2016 is ein bezunjer jaor in hoeze Coenen, want dit jaor is auch hunne zoon Mika tot Jeugprins van de Bessemebènjers gekaoze. Janny en Joyce zeen dit jaor 11 jaor getrouwd, dochter Luna is op vastelaovesmaonjig jaorig en deit later dit joar de kemmunie. Wie raadgek kins se t höbbe?

 

Janny wirk bie ’t femiliebedrief Tegelzèttersbedrief Coenen in Zitterd wo d’r alweer 25 jaor aan de gang is. In ziene vriejen tied is hae leider bie Jong Nederland wo hae de miniore ónger zien hoede haet. Róndj de vastelaovestied geit väöl tied op aan de vastelaovesgroep “Op ’t rendje”  womit ze ’t veurig jaor d’n eëste pries in den optoch  in de wach höbbe gesjleip.

 

Ein anger hobbie van häöm is hendjbaogsjete. Dat begoos bie ziene zoon Mika, mer nao ein tiedje wól hae auch waal ‘ns sjete in plaats van aan de bar hange. Dat ging good en zoa woord hae tweëde bie de Limburgse kampioensjappe in zien klasse.
Ómdat ziene pap eine fanatieke sjöt waor, haet Janny auch ‘nne tied bie de sjötterie gezaete, wo hae ‘t in 2001 gepresteerd haet om burgerkeuning te waere, in ‘t zelfde jaor dat ziene pap keuning waor. De sjport die hae noe bedrif bie Hendjbaogsjötterie Lènjenheuvel pas good bie ‘m, vuntj’r zellef. Dao maogse teminste drènke ónger ’t sjete. Dao krig hae ’n vas hendj van. Auch ried’r gear op ziene moter wo dan regelmaotig ein van de kènjer mit achterop nump veur ‘n rundje.

 

Zien prinses Joyce, opgegreujt es Haverbuul mer vanaaf 1999 eine echte Bessemebènjer, is lid van de awwer-vereiniging van BS Swentibold. Zie haet ummer gewirk op ’n kènjerdaagverblief, mer sins Luna gebaore is, haet ze häör eige kènjerdaagverblief veur de eige poete.
Joyce geit gaer mit vriendinne nao de film of nao ’t theater of geweun effe eine drènke. Veural óm ‘ns lekker te lache en veur de gezelligheid. Thoes is zie veural de gezinsmanager en taxichauffeur van de kènjer.
Regelmaotig zeen d’r feëskes in hun bar in de graasj wo zich hunne sosjale krink dan truf. Want van ’n feëske hilt dit prinsepaar waal.

Joyce zit auch oppe sente, en waal op die van vastelaovesgroep “Op ’t rendje” wo zie de penningmeister is.
En óm d’r veur te zörge dat ze good in ’t klèdje blif passe geit zie auch twee maol in de waek nao de fitnes.

 

Janny en Joyce zeen heël vereërd gevraog te zeen dit zjwaor ambt van De Bessemebènjers te gaon bekleije ónger ’t motto:

“Óm vastelaovend te viere zitse in Bor oppe gooj plek,

Want dit jaor is mit dees daag ’t ganse dörp RAADGEK!”

 

 

Proklamasie

 

Bie grasie van de Bessemebènjersproklamasie gaef ich,

Prins Janny 1 en zien Prinses Joyce,

dees verklaoring oet wo jederein zich aan te hawte haet:

 

Ten 1ste
‘t Is geweldig dat ‘t veur de eëste keër geit gebeure,
dat de Bergsjtraot/Verkeshei helemaol wurt verseerd in de vastelaoveskleuëre.

 

Ten 2de
Vastelaovend viere doon Joyce en ich heël gaer,
vanaaf noe is d’n tied, dus gans Bor: volg mien vaer.

 

Ten 3de
Plezeer make sjteit veur ós veurop,
zoa zètte weer gans Bor oppe kop.

 

Ten 4de
Jónk, awt, groate groep of einselgenger ‘t is ós óm ‘t aeve,
zoalang es weer mer same ‘ne sjoane vastelaovend kènne belaeve.

 

Ten 5de
Skieje of wènjtersjport doot ger mer ‘ne angere keër,
weer wille alle luu die drie daag zeen, elke daag weer.

 

Ten 6de
Begoos wurt d’r mit sjpek en eijer edere dag weer,
daonao kenne v’r pas weer aan het beer.
Zoa belaeve v’r d’n daag mit ‘ne lach,
en kènne v’r vastelaovend viere tot deep in de nach.

 

Ten 7de
Dat dit jaor de zomerkarnaval wurt gezeen es tweëde hèlf,
dan kump de echte vastelaovend sjtömming vanzelf.

 

Ten 8ste
Jeder vereiniging van Bor mót mit in d’n optoch gaon,
ich wil ze allemaol mit zeen trèkke in plaats van aan de kentj te sjtaon.

 

Ten 9de
Euver de tegelkes ken ich dees daag niks belaove,
ich haop dat ze rech kómme te ligke en mit de gooie kentj nao baove.

 

Ten 10de
Ózze groep “Op ’t rendje” mót ós dit jaor misse… dao wille v’r neet te lang bie sjtilsjtaon,
mer v’r wille ze vraoge in d’n optoch veur ós oet te gaon.
Dan kènne v’r nao ze kieke dit jaor,
haopelik höbbe ze zónger ós de pekskes ouch op tied klaor.

 

Ten 11de

Óm vastelaovend te viere zit se in Bor oppe gooj plek,

want dit jaor is mit dees daag ’t ganse dörp “RAADGEK”!

 

Dees proklamasie gultj van de Sjloes tot aan d’n autowaeg en van de sjpaorbrök tot en mit de Sjteinakkerwaeg.

Aldus opgeteikend en aafgerope op 9 jannewari 2016



Reageer op dit bericht:

Je bent niet ingelogged, klik hier om in te loggen
Gebruikersnaam:
Bericht:
Toevoegen:
Klik het gekleurde logo aan om het bericht toe te voegen:
1234