SJPONZERS
EËSVOLGENDE AKTIVITEIT BESSEMEBÈNJERS

Borse Bessemzitting-Leedjeskonkoer
12 jannewarie 20.11 oer
Gemeinsjapshoes

Aaftélle

Prins 2018 René III Tesselaar en Prinses Françoise

 

Tot Prins van de Bessemebènjers is oetgerope René Tesselaar

Hae zal regere es Prins René III

In dit amb wurt-er biegesjtange door Prinses Françoise

 

 

René woord gebaore in Kirkrao es René, Antoine, Laurens in de vroedvrouwesjoal op 17 november 1968 ónger ’t sjterrebeeld sjorpioen, mer hae greude op in Waubich.

Françoise woord gebaore in Nijmege es Françoise, Cornelia, Josephina op 22 november 1969, auch ónger ’t sjterrebeeld sjorpioen.

René en Françoise tróffe zich in 1989 in ein diskoteek in Nuijenhage wo de vlam al gaw euversjloog. Drie jaor later waore ze zoawiet, dat ze kooste gaon hokke in Nuijenhage. Nog  gein tweë jaor later kochte zie ein weuning oppe Hertog Reinaldsjtraot in Bor en dao wone ze nog ummer, same mit hun tweë kènjer Sanne en Merel en d’n hóndj Fynn. Bor woord gekaoze es woonplaats, ómdat dat sentraal lik veur ’t wirk. René verdeent de kos in de rieteel, sins kort bie de “Dierspecialist”. Hae is dao rieteelmennedjer veur ’t rajon Zuid Nederland. Françoise is gróndsjtoewardes op ’t vleegveldj in Baek.

De eëste jaore in Bor höbbe ze zich heël sjtil gehawte in ’t dörp, mer wie de kènjer d’r waore woord de betrokkenheid dan auch groater. Die ginge namelik bie Jóng Nederland, de judo en de hermenie. Bie Hermenie L’Union woord René in 2012 penningmeister. Tweë jaor later promoveerde hae tot veurzitter van dees vereiniging. Wie hae dao begoos waore ’t zjwaor tieje, mer René waor d’r alles aan gelaege óm d’r weer ein bleujende vereiniging van te make, ein taak die ‘m same mit zien angere besjtuurlieje good gelök is. Hae is neet allein besjtuurlik aktief bie de hermenie, auch muzikaal leët René van zich heuëre: hae sjpeelt bie zaate hermenie “Mörge Geit Baeter!?” de lyra en bie ’t groate orkes van de hermenie maak hae deil oet van de sjlaagwirkers.

Sins ’n paar jaor löp ‘r eindelik auch mit in d’n optoch, same mit ziene vrundj Marc Tummers es duo. Beids keëre behaolde zie d’n eëste pries. Noe hae dit jaor oppe prinsewage mittruk geit ‘m d’n driede keër in suksessie langs de naas. Van hoes oet is René neet ech eine karnavalis, mer wie hae de lèste paar jaore mit ziene vrundj in d’n optoch mitleep haet’r ’t echte vastelaovesvirus opgeloupe. Veural de sjpas veuraaf vuntjer ’t allersjoanste. Hae vuntj ‘t dan auch ein heël eër door de Bessemebènjers te zeen gevraog óm Prins te waere.
René is kieper van de veterane zaalvoetbalklup wo d’r wirk aan zien kondiesie. Daonaeve is hae ram versjlingerd aan de Formule 1. Alles wurd bekeke, gekloesterd aan d’n tilleviezie en de F1-app in de henj, zoadat ‘m niks óntgeit. En dao-in geiter wiet, zellefs zoawiet datter tiedes ’n konzert van de hermenie, hae haw op dat mement toch niks te doon, de rees aan ’t volge waor oppe tillefoon. Mer good dat d’n dirizjent dat neet haet gezeen.

Françoise deilt mit René de leefde veur meziek, want auch zie is aktief lid oppe klarinet van ”Mörge Geit Baeter!?” en daonaeve auch van L’Uniage. Es begeleidster van ’t jeugorkes zörg zie dat ’t bie de jóngste leeje van de hermenie auch altied good löp.
De wèntjersjport veur de vastelaovend zal ze dit jaor veurbie mótte laote gaon. Mit de vastelaovend zellef wilt ze noats weg. Ein jaor haet ze dat ‘ns geprobeerd, mer dat waor heël sjlech bevalle.
Es Françoise behoefte haet aan ’n frisje naas, truk ze mit d’n hóndj Fynn d’ropoet. Mer wiejer, zaet ze zellef, is ‘t ’n eenvoudig maedje dat zich heël erg sjpich oppe vastelaovend.

’t Hoof wiejer gein toelichting meër: De Bessemebènjers höbbe weer ein Prinsepaar gekaoze dat d’r vas en zeker veur geit zörge dat “’t KRAAK”. Is ’t neet oet zien voge, dan waal muzikaal.

 

 

Proklamasie

 

Bie grasie van de Bessemebènjersproklamasie gaef ich,

Prins René III en mien Prinses Françoise, dees verklaoring oet, wo ederein zich aan te hauwte haet:

 

Ten 1ste:

Weer heel greuëtsj zeen dat weer es luuj van de kawwe kentj,

door de vors gevraog zeen ‘t prinselik paar te waere van ‘t sjoan Borse lendj

 

Ten 2ste:

Weer de sjtraot wo ózze prinselike residentie sjteit,

om wille duipe es “Hertog Reinald Allee”, ‘t is mer dat ederein ‘t wèt.

 

Ten 3ste:

Ós dochters Sanne en Merel höbbe al hun ganse laeve get baove aan hun verlanglieske stjaon,

Einmaol prinses te zeen, dat liek ze toch zoa sjoan.

Noe de mam ze is veur gegaon,

Haope weer dat ze hiejvan net zoaväöl kènne geneete en same mit ós dit feës viere tot ‘t op esjelegoonsdig is gedaon.

 

Ten 4ste:

Miene kammeraod Marc Tummers zal helaas in d’n optoch dit jaor ech als einzelgänger mótte gaon.

Ich haop dat hae veur de prinsewage wilt oet loupe, zoadat ich ‘m toch nog kèn biesjtaon.

Ózze eër hoag hauwte en veur de 3e keër de eëste pries wènne, is noe zien taak,

mèr ich weit zeker dat hae auch dit jaor, de luuj langs de kentj weer vermaak.

 

Ten 5ste:

De hermenie haet noe ‘nne veurzitter mit sjteek en vaer,

Weer vènje dan auch dat jeder muzikant dit feëske met ós mit mót viere, mit väöl sjpas en plezeer .

De groate tróm hauwe bie de hermenie is mit deze optoch van de baan,

mèr vanaaf de prinsewage gaef ich waal de maot aan.

 

Ten 6ste:

Net es mien veurgengers wil ouch ich, gaer alle deilnummers van de groate optoch vraoge mit de kènjeroptoch mit te goan,

Weer mòtte de jeug laote zeen wie sjoan vastelaovend in Bor is, zoadat zie ós veurbeeld volge en ‘t feës in eige dörp zoa zal blieve besjtaon.

 

Ten 7ste:

‘t Vleegveld in Baek en de deersjpesialis, zulle ós de kómmende tied minder zeen dan ze leef is,

Mèr nao de vastelaovend es alles is gedaon, zulle weer mit ein ervaring rieker es vanawds veur ze klaor sjtaon.

 

Ten 8ste:

Weer de Raod van Èllef, de Senaat en ‘t Optochkommetee op veurhendj willen zegge: super BEDANK,

Want zónger uch kump de Borse Vastelaovend ech neet op gank.

 

Ten 9ste:

Dit jaor dendert de vastelaovestrein door Bor mit ‘t thema: ‘t KRAAK

Weer wille dan auch dat ederein mit vastelaovend in ós eige Bor d’r ein manjefiek sjpektakel van maak.

 

Ten 10ste:

Weer ‘t fein zouwe vènje es ós vrunj van ZH Mörge Geit Baeter!? ós bie ‘t bessemverbrenne wille biesjtaon,

óm zoa ‘t aafsjeid van vastelaovond, veur ós get draaglijker te make es ‘t allemaol ech is gedaon.

 

Ten 11ste:

Mien liefsjpreuk: “Nil volentibus arduum” of te waal “niks is te lèstig veur degene die wille” in ‘t dialek gezag.

Jederein kènt zoaväöl meër es d’r hauw gedach.

Sjtaon positief in ‘t laeve, maak sjpas en plezeer,

Dan zal se zeen, ‘t laeve brunk dich dan zoaväöl meër.

 

 

Dees proklamasie gultj van de Sjloes tot aan d’n autowaeg en van de sjpaorbrök tot en mit de Stjeinakkerwaeg.
 

Aldus opgeteikend en aafgerope op 6 jannewarie 2018




Reageer op dit bericht:

Je bent niet ingelogged, klik hier om in te loggen
Gebruikersnaam:
Bericht:
Toevoegen:
Klik het gekleurde logo aan om het bericht toe te voegen:
1234